Posts Tagged ‘شعر عامية’

عيني غفلت حبتين، بعد الفطار
– كل عام وانتم بخير رمضان كريم
عيني غفلت، م التعب طول النهار،
والمجاهده، والمناهده، وسين وجيم،
لحظه والتانيه، وبعد اللحظتين،
جاني إحساس إن حد دخل قعد،
وابتدا يسبَّح، وابص بنُص عين،
نُص قلبي انسر، والنُص ارتعد.
شفت بيرم. أيوه بيرم.. أيوه هوّه..
لبْده مصري، جلابيه مغربي،
شمله شامي، سبْحه من أرض النبوه.
حد ما يعرفش بيرم والنبي؟..
شفت بيرم، بالصديري اسكندراني،
شفته، متلفع بشال من العراق
والحزام يَمَنى، وعطر الإيد سوداني..
حد ما يعرفش بيرم يا رفاق؟..
- ضحكته المُرّه اللي بتنقّط عسل.
قلت: خير إنشالله. قال: فين الديوان.
فين “ديوان بيرم”. ما بطلتوش كسل؟..
قلت له: معلهش.. قال معلهش إيه!
ونا تايه عن بلدنا يا ولد؟..
البعيد عن عينها، يا حسره عليه..
يا بلدنا، يا حلوه، آه منك بلد!
قلت له: راح نحتفل بك. قاللي: لا،
احتفالكو وفَّروه على نفسكوا.
قلت له: ح نشيد بفضلك. قاللي: ها،
فضلي فين، إذا كنتو ناسيين درسكوا؟
قلت له: علِّمنا: بيرم قاللي: شوف،
المياتم في الأزقه ملطَّعه،
أنا مش عايز كراسي صفوف صفوف
أنا. صفُّولي حروف المطبعة!!
فجأه لقينا الليلْ بيشتي نهارْ
والأرض بلبلْ والسما فرجه
وانْ كان ما حدش سامعه بيغني
بين المراوح وقفت العربْيَّه
الضى شعشع والشجر سلويت
أنا وحبيبتي في قميص باكمام
عينيها ترعش من جمالْ المنظرْ
بلعت ريقي ييجي ميت مرهّ
وكل مرهّ ينقطع صوتِي
بذلت مجهودْ الجبابره وأخيرًا
قلت لها خليكي هنا ويًايا
حتروحي فينْ ويّا الهوى ويّاه
قالت لي ياه
قلت لها يايا ويايا
واحْنا بقينا في آخر الدنيا يا
والزنبلك داير على الفاضي
اتلفتت لي المستبدّه اللطيفهْ
وخدّها بينطر دموعْ مش نازلهْ
والحبّ أرحم لما يبقي مغازلهْ
قالت لي عيب بدل الموتْور والمحرِّك
ياعم يا شاعر تقول زنبلك لكْ
سنن بقي في المعاني تلكلكْ
وتنشغل بالْلفه والأسلوبْ
والتعلب المكار أبو التعلوبْ
ولّع سيجاره والاَّ مش حتولّعْ
راجع لي بعد المدرسه تدلّعْ
دخانْك اسودْ يبقي قلبك شايلْ
لكن حاسيب حضني في حضنك مايلْ
اكمنّش التفكير في حلّ المشاكلْ
دا همّ طيّب من هموم الحياهْ
قلت لها ياه
قالت لي يايا ويايا
واحْنا بقينا في آخر الدنيايا
والزمبلك داير على الفاضي
ردّيت كأني من بعيد مش سامعْ
يا لابسه من تحت الودع تنَوَّرْهْ
معسله زى القمر في الشمسْ
باام الليالي الهاطله المشمورهْ
ياريتني أعمي أشربك بالْـَّلمسْ
والاَّ أشمك من بيار الأمسْ
قالت حتقلب جدّ يا مسكينْ
قلت لها أستاهل حدودْ الموتْ
أنا الحرامي سارق السكينْ
سلّمت نفسي إنْ هذا الصوت
بكا شفايفي من شفايفكمْ
غاوي العطش أفضل أشم الليلْ
والاَّ أموتْ الظهرْ شايفكم
قالت لي غني يا ولد شامي
وغني مصري يا ولد مصري
غرفه لفوق البرج أعلامي
وتعالي بين الضفتىن قصري
أتاريني جني وهي جنيّاه
قالت لي ياه
وانا قلت يايا ويايا
واحْنا بقينا في آخر الدنيايا
والزمبلك داير على الفاضي
قلت لها والنورْ اللي جوّانا
ينـَهَجَ في تقليد اللي بيشوفه
كتر الطاووس زى السمك في المرج
ورقصة الأسياف تنقـَّط لولي
نورْتِ بيت الشعر يا أمُّوره
قالت لي دا انت اللي ولد أمُّور
يا طفل شايبْ في قماط دمّور
خد المرايه بص شوفْ الوسأمَّه
رسمت كلامي ودنك الرسأمَّه
وِدْعوا لنا نوصل قصرنا بالْسلامه
الجن والناسْ اللي في الحلزونهْ
يسلم لي بقك دا اللي انا ساقياهْ
وانْ قال لي ياه
انا اقول له يايا ويايا
واحْنا بقينا في آخر الدنيايا
والزمبلك داير على الفاضي
اتكلموا.. اتكلموا.. اتكلموا..
محلا الكلام، ما ألزمه وما أعضمه.
في البدء كانت كلمة الرب الإله،
خلقت حياه، والخلق منها اتعلموا..
فاتكلموا
في البدء كانت كلمة الرب الإله
روح بجناحين شطار،وصار للكون مداه.
آخر مطافها، جت وحطت ع الشفاه،
لما البشر ملكوا الوجود، واستحكموا..
فاتكلموا
الكلمه إيد، الكلمه رجل، الكلمه باب،
الكلمه نجمه كهربيه في الضباب
الكلمه كوبري صلب فوق بحر العباب،
الجن يا أحباب، ما يقدر يهدمه..
فاتكلموا
الرمل مرمي تحت قبة السما،
مشتاق لقطره من المطر فيها النما،
ملايين سنين عمره ماداقها، إنما
فيه كلمه تقدر في المراوي تِعَوِّمُه..
فاتكلموا
فيه كلمه تقدر تزرع البور حور ضليل،
وكلمه تقدر تجعل الكوخ بيت جميل،
وابو العيال والجلابيه الهلاهيل،
فيه كلمه تعطيه مال، وكلمه تِهنْدِمُه..
فاتكلموا
لكم السلام، يا ملفوفين حول اللهب،
يا غواصين في القلب ع الكلمه العجب،
في البدء كانت كلمة الرحمن سبب
وما عادش غير الحق كلمه تِتَمِّمه..
فاتكلموا
أنا لوحدي مفيش حاجه
مجرد اسم متشخبط على ورقه
في إيد واحد مدير أصله قومسيونجي
يقدمها لتركي والا لخواجه
لا يعرف عربي ولا شفقه
يروح ماضي بقلم باركر بلا فرنجي
أروح مرفود
وأصبح اسم متعلق على اللوحه
تشوفه زمايلي في الجايه وفي الروحه
يفوت عامل في إيده نص شقّه بفول
يقف ويقول:
يا عالم ربنا موجود
مفيش مهرب من التوفير
وعامنول مارفدوا كتير
ويدخل وحده في المصنع
ونا أطلع
أنا لوحدي
أنا لوحدي مفيش حاجه
مجرد اسم في الجلسه بيتنادى
ما بين ميت إسم وزياده
وجدول جلستي مليان.. والقاضي
مهوش فاضي
يناديلي أقول له يا سعادة البيه
مدير المصنع الدّباح قَطَع عيشي
يقول لي عشان جريمة إيه
وينزل أسئلة يسألها ضُبّيشِي
وقدامه قانون عقد العمل ودوسيه
واسمي عليه
ونضارته وحبابي عنيه
ونا مجرد تلات كلمات على الأوراق
أسامينا أنا ووالدي
واسم اللي اترحم جدي
ما يسألنيش ويسأل نفسه باستهزاء
عن الأوراق
وعن إثبات
بمستندات
أقول له مفيش
يقول لي خلاص ما تفلقنيش
ويتمزّج محامي الشركة ويهقهق
خلاص القاضي أنهى المشكلة رسمي
ولا اترافع ولا دافع ولا زعّق
وفيه أسماء ينادوا عليها غير إسمي
وحيد.. مدحت.. شريف.. سامي
يخشوا الجلسه بمحامي
ونا أخرج
وروحي من الشقا بتعرج
أنا لوحدي
أنا لوحدي مفيش حاجه
مجرد إسم كاتبه ف دفتر الأحوال
جدع ضابط بوليس فرحان
بنجمه يمين ونجمه شمال
يقشّر موزه ويأشّر
على المحضر
ويبعت عسكري يجيبني مع المحضر
وأصبح إسم يتكفن بكل لسان
من السكان
بعيد عن بيتكو يام فلان
خلاص بيبيعوا عفش فلان
وحا يطير الجهاز كله
بوريه ونحاس وربطة فَرْش
وصاحب المِلْك يفضل له
تلاته جنيه وستين قرش
وتمشي مراتي بعيالها
عشان تاكل في بيت ابوها
هناك فيه ناس يحبوها
أوصلها
وفي السكة تقول ربك يعدّلها
واشوف كل الدموع بتفور وبتلمع
ورا البرقع
أقول لازم نعدلها
وتدخل هيا بعيالها
ونا أرجع
أنا لوحدي
بالأسبرين.. والسكاكين
وبالمسدس مقتولين
على أعمدة كل الجرايد مصلوبين
شُبان صغار
أزهار في فجر العمر ما شافتش النهار
متكلبشين في الزنــــازين أو مغـروزين
في الطين قصر النيل وعايزين غطّاسين
ع المشرحة إنسان نحيف
بشنب خفيف أصفر لطيف
خدوده من قيمة يومين مش محلوقين
صوابعه من شرب السجاير محروقين
عينيه على جدار الفراغ متسمّرين
وعلى الجبين رفرف سلام الميتين
ما تسألوش كان اسمه إيه
اسمه على المحضر بقى المجني عليه
اسمه بقى الجثة في أوراق الدوسيه
ما تسألوش عن قصته كان موته ليه
المسألة صبحت في إيد المسئولين
على ذمة التحقيق سجين
إنسان حزين
في قلبه إحساس الغريق
مالهش عون
في دماغه أكتر من حريق
لابس قميص مربعات وبنطلون
وف رجله صندل من زمان مالهش لون
يبص على آخر الطريق
يلاقيه ما بين رجليه تمام
ثابت عليه الاتهام
وحياته بين الناس حرام
حرام عليه يركب ترام
حرام عليه الأُتوبيس
حرام عليه الأرصفة والفوانيس
والمدرسة والسينمات
مكتوب عليه يعيش ما بين المحابيس
في اللومانات
ما تسألوش ده يبقى مين
شفتوه وبتشوفوه كتير في الجرانين
بلاش سؤال
على كل حال
المسألة صبحت في إيد المسئولين
على ناصية الشارع أمين
واقف مع حسين واسماعين
وبنيامين
متسرحين ومشمرين
وشويه يوصل مصطفى وعبد السلام
ويبتدي يحْمَى الكلام
ويغمزوا بعينهم ويمكن يشتموا
ويقولوا لفظ بذيء وهُمّا بيضحكوا
ماتفرحوش لما تشوفوهم من بعيد
نازلين هزار وقزقزه
وما تقولوش يا ريت زمان التلمذه
يعود علينا من جديد
بيشتموا
وف كل قلب صراخ يحاول يكتمه
بيضحكوا
وف كل صدر عويل ونار راح تهلكه
وتفركه
ما تفرحوش
وفكروا إزاي نحوش
اللي حايشرب له قزازة أسبرين
واللي حايطعن أمه أربع سكاكين
من قبل ما المــــيت يموت
مــن قبل مـــا الأيام تفوت
والمسألة تصبح في إيد المسئولين.
عن القمر والطين PDF
عن القمر والطين Word
جايه عروس الشعر م البغالة
بملاية لف وكف محني
شافت صوان وحبال وناس شغاله
وانا بابكي جنب الباب ومستني
والشمس تقطر حزن ع الصبحية
مين اللي مات يا شب يا بو دموع؟
قالت عروس الشعر للموجوع
مين اللي مات يا شب، قل لي يا خويا؟
قالت عروس الشعر .. لا يكون ابويا
أنا قلت ابونا كلنا يا صبية
مات زى ما كتف الجبل يتهد
مات باقتدار وفخار ما قالش لحد
بيرم.. ومات ماشي في طريق الغد
وجنازته ما شية اهه في شارع السد
والنعش عايم في الدموع في عينيا
فايت في قلب القاهرة ومعدي
هو عارفها وهي مش عارفاه
على كل حارة وكل عطفة يهدي
كأنه راجع لسة من منفاه
بيبوس بعينه اللبدة والجلبية
ده القبر ده.. والا كمان منفي
طالع علىه الشوك والحلفا
ده القبر ده.. والا كمان تبعيده
حدفوه علىها كلمتين في قصيدة
بيرم.. فتحت ديوانه رد عليا.
يا صابر الصبر الجميل الله معك
ما أروعك ياشعبنا وما أشجعك
جرحك فلسطن يوْجَعك تزداد وجود
وتحول الأحزان بارود في مصنعك
الله معك.. الله معك.. الله معك..
دلوقت في البساتين أوان عطر الزهور
لهفي علىه وهناك مفيش من يعشقه
إحنا ورا الأشواك وسبعين ألف سور
والعطر ما يرضى بسوانا ينشقه
تطلع زهور البرتقان
تشبه عيون فتيان عرب
تبص للأرض بحنان
وتبص للجانى بغضب
يغضب نسيم البحر والأمواج تثور
يا شعب يا منصور تعالي بمدفعك
الله معك.. الله معك.. الله معك..
يا أرضنا المسجونة سجنك راح يزول
شعبك على الأبواب مسلّح بالأمل
كلمة فلسطين زى دقات الطبول
بتدّوّى وتحمس وتدفع للعمل
راجعين بقوة السلاح
راجعين في بحر من الدما
راجعين كما رجع الصباح
من بعد ليله معتمه
راجعين سيول.. من الصحارى للسهول
زى الرسول يا شعب نازل بنفعك
الله معك.. الله معك.. الله معك..
يافا.. وشباك انفتح يوم الرجوع
طلوا من الشباك جميع أهل الوطن
إحنا هنا ياشمس ياطير يا ربوع
عدنا وخدنا الثار من عار الزمن
ده حلم.. لكن له معاد
شعب العروبة يحققه
وعدوّنا لو زاد وعاد
قوة سلاحنا تسحقه
الفجر طالع مين يحوشه من الطلوع؟
وياشعب يا ممنوع يا ويل من يمنعك
الله معك.. الله معك.. الله معك..
ماليش كتير في السياسة
لكن بافكر
وماليش كتير في الكلام
لكن باعبر
من قلب مليان حماسه
وباقول كلام في السياسه
باحلم تملي بالسعادة والأمان
باحلم أعيش من غير ما خاف غدر الزمان
وِان جيت ونلت المنى
يصعب عليا الهنا
من غير ما يتهنّوا جميع الناس كمان
ما اسعدش غير ف وطن سعيد من حواليا
سموا الشعور ده حب والاّ اشتراكيه
ماليش كتير في السياسة
أوقات احس كأنى على مفرق طريق
أحتار ويصبح قلبى في الأفكار غريق
ولما اشور الجيران
واشاور الخلان
رأي الصواب يظهر جرىء وله بريق
واحس رأى حبايبى بينور عينيا
سمّوا الشعور ده حب والاّ ديمقراطية
ماليش كثير في السياسة
بينى وبين أيامى حرب ما تنتهيش
وزى كل الناس باموت علشان اعيش
أتمنى اروح عندهم
جهدى على جهدهم
يصبح وجودنا قوه بعد ما كان مفيش
وانا إيش اكون وحدى لولاش بلدى علىا
سموا الشعور ده حب والا تعاونيه
ماليش كتير في السياسة
أنا قلبى مليان حماسه
لكل شىء حر صادق
ماليش كتير في السياسة
لكن باحب المبادئ
وباحب صاحب المبادئ
والاشتراكية
الديمقراطية
التعاونية
( 1 )
اللحم طين والعروق دود من ديدان الطين
آدم وحوا على أرض العدم حاطين
عاقبهم الرب.. أخرجهم
من الجنة
آدم عمل حضن حوا جنته وغنى
الناس تتهتنى مهما يكونوا منحطين
( 2 )
الولف لو شاف وليفته ورا الجبل هدمه
ياميت ندامة على جبلين واصطدموا
اتهد منهم جبل اسمه هابيل وانهار
قابيل أخوه اللى قاتله سكب دموع أنهار
واللى افتتن بالنهار… بالليل يا ندامه
( 3 )
مرات عزيز مصر شابة وجوزها راجل كهل
يوسف حليوة فلسطينى عديم الأهل
فؤادها قاد نار وصار تحت النهود لاعب
تهبش فى يوسف وتترجاه وتداعب
والعقل صاعب لكين خلق المتاعب سهل
( 4 )
وفى التاريخ كليوباترا الاسمرانيه
كانت غرامها غرام اسكندرانيه
غرام عنيف له حفيف تعبان ولسعة نار
من عشقها لحسنها خافت عليه يحتار
واختارات الانتحار… المعجبانيه
( 5 )
من برق سيف الجدع.. يطلع صباح أمله
عنتر معنتر لكين مسكين أبوه همله
بسيفه قدّف فى بحر الدم عدّاه عوم
ولجل عبلة وقلبه منها.. ساد القوم
والحُر له يوم يدوق الشهد  من عمله
( 6 )
عالم من الهمس من غير أمس من غير غد
الشمس ليلى.. القمر ليلى.. السؤال والرد
ليلى.. ومجنونها قيس هايم يقول ليلى
دي مهما كانت لغيري وقسمتي مايلة
الروح ما دام طايله.. ما يهمش تنول اليد
( 7 )
عنتر من الغرب، أسمر، يند هوله عطيل
كلل على ديد مونه وشالها في عينيه شيل
بياض عيونه لمع من ضي حلاوتها
أولاد حرام غيروه بالغيره موّتها
والغيره غشوتها ما تفرق نهار من ليل
( 8 )
كل الأحبة على حبال الهوى طالعة
فاكرين نجوم السما شبابيك غرام والعة
انظر لروميو الجرىء طالع يشوف جولييت
تعرف بأن الغرام يكره ببيان البيت
وان كنت حبيت ما تهزم قلبك القلعه
( 9 )
الريح تباريح جريح ما ينتهيله أنين
حسن قتيل من سنين ونعيمه فى المجانين
على كل ملقف هوا تستنى تستنى
يحيلها صوت كله موت ويئن له انه
والحب له ناس فى جنه وناس غلبانين
(10 )
كان يا ما كان فيه ملك لكن مالوش أحباب
عشق رمى التاج وعاش العمر كله شباب
فيه ناس يقولوا عليه مجنون وناس جاحد
وانا اقول ابيع عمري كله بيوم غرام واحد
ده الحب والحق واحد  يا أولى الأ لباب
الشعر شارد فى الجبل منى
عملت انا هجان ورحت وراه
قلبى دليلى يطير ويغنى
عصفور جناحه بدمه متحنى
لففنى لففنى الجبل ولا تاه
تسقي الرياح سبعين صباح وصباح
قلبى دليلى وانا وراه سواح
والشعر شارد فى الجبل منى
حبيت غزال غنيت له بالموال
صد الغزال ساق الدلال أهوال
حبيت غزال غنيت له غنيوه
صد الغزال علشان ما هو حليوه
غنِّيت له رصد
هجَر بقصد
غنِّيت صَبَا
جافى ونبا
غنِّيت له بياتى
رقَّاص انا وشاعر وناياتى
وافدى رفاق الفن بحياتى
وافديك يا نجم اخضر يا بياتى
أفديك انا
يا عندليب ع المشنقة عشة
عافر مع الجلاد قام هشه
علشان يروق الجو لفعَاله
يقتل ويعمل كل ما بداله
يهبش فى ورد الحب ويحشّه
صوتك من البلد البعيد جاله
عدَّى من الحراس وعدَّاله
وكأن يد الرب نازلا له
تكشف نقاب الغش عن وشه
افديك انا
يا عندليب ع المشنقة عشه
خارج فى يوم العيد وقلبى سعيد
شفت البنات يتعاجبوا فى الألوان
كأنهم أغانيك يا بياتى
يابو الأغانى الزرقا والخضرا
وكأن حملك بان وآن له أوان
مديت خيالى للعراق… لبعيد
لابنك ” على ” وهاديته بالّونة
كاتب عليها جميع حكاياتى
كان يا ما كان
ملك الزمان
كان يا ما كان
ظلم وهوان
إنسان جعان
كان يا مكان
وكأن حلمك بان وآن له اوان
الغنوه زرقا والكلام بجناح
فتحت انا للشمس شباكى
على قاعدة الشباك انا تاكى
بين شفِّتى وصوابعى ناى نواح
تسقى الرياح سبعين صباح وصباح
قلبى دليلى وانا وراه سواح
والشعر شارد فى الجبل منى
يا بخت من يقدر يقول
واللى ف ضميره يطلًّعه
يا بخت من يقدر يفضفض بالكلام
وكل واحد يسمعه
يقف فى وسط الناس ويصرخ : آه يا ناس
ولا ملام
ييجى الطبيب يحكى له ع اللى بيوجعه
يكشف مكان الجرح ويحط الدوا
ولو انكوى
يقدر ينوح
وأنا اللى مليان بالجروح
ما اقدرش اقول
ما اقدرش ابوح
والهم يسكن صدرى ما اقدرش انزعه
شوفى قد إيه؟
احنا النهارده إيه فى أيام السنة
شتا والا صيف؟
وفين أنا؟
ايه اللى وصلنى هنا؟
أنا صاحب البيت والا ضيف؟
صوتى انحبس
ما اقدرش اقول
ما اعرفش حاجه عشان اقول
ما اعرفش غيرك انتى بس
يا بت يا للى ف حبك العقل اتهوس
مكان غريب
كأنه سجن كأنه مخدع لحبيب
كأنه بير
شباك حديد وعليه ستاير من حرير
والريح بينفذ منه زى المسامير
الريح عوى
قلبى انقبض
قلبى اتلوى
الشمس تَلْج اصفر شعاعها صاروخ هوا
الضلمة تَلْج اسود كتير
ألوف ألوف القناطير
خبيبتى فى شعورك يا بت
أحسن عروقى اتخشبت
شعرك خشن زى الحِرام الصوف يا بت
خيبتى فيه م الزمهرير..
ونيِّمينى فى السرير
دخل النبى بردان خديجة لفته
حطت عيله غطيان لحد ما دفته
دخل النبى بردان وقال: فين الغطا؟
البسمة غطت شفِّته.
قاهر الأباليس مع العروسة والعريس PDF
قاهر الأباليس مع العروسة والعريس Word
حمار شهاب الدين PDF
حمار شهاب الدين Word
الفيـل النونو الغلباوي PDF
الفيـل النونو الغلباوي Word
الشاطر حسن PDF
الشاطر حسن Word
الليلة الكبيرة PDF
الليلة الكبيرة Word
منوعات غنائية PDF
منوعات غنائية Word
رباعيات PDF
رباعيات Word
أزجال صحفية Word
أزجال صحفية PDF