المسحراتي فؤاد حداد (32) عنتر

Posted: 3 أغسطس 2011 in مختارات أدبية
الوسوم:, ,
اصحى يا نايم وحّد الدايم
وقول نويت بكره ان حييت
الشهر صايم والفجر قايم
اصحى يا نايم وحّد الرزاق
رمضان كريم
مســحـراتى
مـنـقـراتى
بين الحاراتِ
بافوت أسحر
واقول وأعبّر
زحنا اللى زاحنا
ولفوق قزحنا
شوف قوس قزحنا
فى الجو قنطر
تعا  شوف يا عنتر
عنتر وعبله
عامل وعامله
أما المُزامله
تهديهم أكتر
تشد قوسهم
وتزيده أسهم
ترفع رءوسهم
الله أكبر
أما الشهادة
جت تاتا تاتا
بتـَـتـَهَادى
وتـَتـَغَـنْـدر
أمّا نوبتها
خدت نوبتها
بيبنوا بيتها
على الشمندر
شكر فعالى
آبا ودعالى
بسد عالى
الخير يفجر
ويشق صحرا
على يد سحره
تلبس مشجّر
والميه تجرى
وتخف رجلى
من الوجع دا
أنا مالى قعده
والمشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
عنتر ملك فى القوافى وغَزَلْها
صرع سباع الفيافى ورق لغزالها
عشق حوريه اسمها الحريّه وغزا لها
ذبيان وطى وضرب فى الحى بالحدّين
السلم كان حلم ما اتلمت عليه يدّين
إن عاد لعبله قطف قبله من الخدّين
وجمع فى توبها خيوط الشمس وغزلها
اصـحى يا نايم وحّد الدايم
السعىُ للصوم خيرٌ من النوم
دى ليالى سمحه نجومها سبحه
اصـحى يا نايم.. يا نايم اصحى
وحّد الرزاق

تسعدني تعليقاتكم

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s