المسحراتي فؤاد حداد (34) تونس الخضرا – ألحان وغناء/ سيد مكاوي

Posted: 5 أغسطس 2011 in مختارات أدبية, أغاني وموسيقى
الوسوم:, , , ,

اصحى يا نايم وحّد الدايم
وقول نويت بكره ان حييت
الشهر صايم والفجر قايم
اصحى يا نايم وحّد الرزاق
رمضان كريم
سحّر يا مســحـراتى
نقّر يا مـنـقـراتى
تونس خضرا الليله دى
جاى بربابه خضرا
خيال ومغنواتى
طبال والا ناياتى
تحت البرق الزناتى
وفى قلبى قطره قطره
دموع فى الضحك أطرى
من العنب البناتي
على اسنان العزيزه
زى الخفاجه عامر
غنى وخفق وغامر
قلبى فى ألف سامر
وألف غيط وجيزه
وألف نيل ودلتا
وانا ماشى بدراعاتى
شفت الجنه فى حياتى
خدت فى حضنى الوطن
المغرب واليمن
يا تونس ونّسينى
كل الزمن نسينى
ونسيت كل الزمن
إلا أنس الليله دى
والمشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
ما نختلفشى فى نسبه أحمد بن عروس
كان من صعيد مصر والا تونس الخضرا
هناك بنوا له مقام فوق الجبل محروس
هنا بنوا له فى أوطان القلوب حضره
على لسان كل مصرى كلمته حاضره
عرب نغرّب نشرّق
يجمعنا شاعر وآه
لو حد بيننا يفرق
ما نستاهلش الحياه
اصـحى يا نايم وحّد الدايم
السعىُ للصوم خيرٌ من النوم
دى ليالى سمحه نجومها سبحه
اصـحى يا نايم.. يا نايم اصحى
وحّد الرزاق

تسعدني تعليقاتكم

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s