المسحراتي فؤاد حداد (37) بيوت كتيرة

Posted: 8 أغسطس 2011 in مختارات أدبية
الوسوم:, ,
اصحى يا نايم وحّد الدايم
وقول نويت بكره ان حييت
الشهر صايم والفجر قايم
اصحى يا نايم وحّد الرزاق
رمضان كريم
مســحـراتى
مـنـقـراتى
طلبت مراتى
مهر الاميره
وانا بحر فنى
شال ميت جزيره
أنا المغنى
لبيوت كتيره
من اللى قسطُه
قطم له وسطه
ولا اللى مطلى
بمزاج عواطلى
من بره رايق
مليان حرايق
أصل القرايه
مش فى المرايه
لكن فى صفحه
أبيض على اسود
دى حكمه واضحه
خلّينى أحْوِد
على بيت فى حاره
لولى فى محاره
وبيت فى عطفه
لولى فى صدفه
وبيت فى قوقع
خايف ليوقع
وبيت بساقيه
ع العهد باقيه
وبيت عتبته
عنوان كتابته
وبيت فى زقه
بعيش ودَقّه
وبيت خَزينُه
لخبازينُه
وبيت يولَّد
الجاى بعده
ولا حد خلّدْ
ولا حد وحده
على المداخل
بعد المداخن
بيوت مداين
ابنى يا وعده
بيوت بُناتها
عرسان بَناتها
أنا بيناتها
المشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
المشى طاب لى على طبلى وناياتى
تشب فيها العيدان تجرى قناياتى
تسقى وانا سقّا
عمره ما قال لأّه
تحت القمر شقَه
قالت الشوارع باتابع دَقَّةً دَقَّه
ودقَّةً دقَّه تتمايل بناياتى
اصـحى يا نايم وحّد الدايم
السعىُ للصوم خيرٌ من النوم
دى ليالى سمحه نجومها سبحه
اصـحى يا نايم.. يا نايم اصحى
وحّد الرزاق
Advertisements

تسعدني تعليقاتكم

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s