المسحراتي فؤاد حداد (39) هلال

Posted: 10 أغسطس 2011 in مختارات أدبية
الوسوم:, ,
اصحى يا نايم وحّد الدايم
وقول نويت بكره ان حييت
الشهر صايم والفجر قايم
اصحى يا نايم وحّد الرزاق
رمضان كريم
مســحـراتى
مـنـقـراتى
أملك قيراطى
من الكليم
رمضان كريم
الله أكرم
دا غير قيراطى
من الحصير
إن زاد إيرادى
فى الدائره دى
يصبح أراضى
بساط حرير
زى الهليِّل
تلاقيه قليِّل
تفضل تليِّل
يصبح كبير
يفضل يناور
بين المناور
فى جوز أساور
يقع أسير
يرجع يغازل
بين المنازل
مالوش عواذل
هلال أمير
هلال يقول لى
أنا حلو كلى
شوف عقد فلّى
صُنع القدير
هلال حمامه
تحت الغمامه
لبست عمامه
ما فيهاش تطير
هلال بيجرى
فى بحر هجرى
قال ضىّ فكرى
للمسـتنير
هلال بلدنا
على ألف مادنه
لله حمدنا
حُسْن المصير
والمشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
لو تسأل الليل يقول لك راضى بالمقسوم
والقله فى الفجر حتقول لك عن الماء صوم
واحنا عرب كلنا أصحاب طرب مقسوم
حلوين على كل حال لكن سوا أحلى
يا سواحليه
ومن الصعيد للبحيره للدقهليه
إحنا أهليه
تجمعنا ساعة السحور تجمعنا طبليه
قضينا ع الجاهليه نحمد الواحد
القلب واحد ولو كان الرغيف مقسوم
اصـحى يا نايم وحّد الدايم
السعىُ للصوم خيرٌ من النوم
دى ليالى سمحه نجومها سبحه
اصـحى يا نايم.. يا نايم اصحى
وحّد الرزاق
Advertisements

تسعدني تعليقاتكم

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s