المسحراتي فؤاد حداد (42) تبارك اللهُ ذو الجلال

Posted: 13 أغسطس 2011 in مختارات أدبية
الوسوم:, ,
اصحى يا نايم وحّد الدايم
وقول نويت بكره ان حييت
الشهر صايم والفجر قايم
اصحى يا نايم وحّد الرزاق
رمضان كريم
مســحـراتى
مـنـقـراتى
نيلى فراتي
أشرب زلال
وأقرأ وردى
وارعش يا ولدى
من تحت جلدى
فى الابتهال
تبـارك اللهُ ذو الجـلال
اللـه رحيم
إن كنت باطمع
قلبى سليم
فى عينى يلمع
نور النعيم
وبودنى أسمع
أدان بلال
تبـارك الله ذو الجـلال
اللـه ودود
أحب وطنى
من غير حدود
وانقّى قطنى
من كل دود
واخد فى حضنى
كل العيال
تبـارك الله ذو الجـلال
الله لطيف
تغنينى لقمه
من الرغيف
عن جنس لُؤَمَا
وانا الضعيف
من أجل حكمه
أشيل جبال
تبـارك الله ذو الجـلال
أشيل جبال
واخد فى حضنى
كل العيال
واسمع بودنى
أدان بلال
طريقى خالى
من الضلال
حالف ما اخاوى
إلا الحلال
كل الخطاوى
على كل حال
حتنحسب لى
والمشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
يا أبو القلوب اللى بتسنبل وبتزهّر
واللى بتبنى الحياه وتشيلها وتعمّر
أنا قلبى من نفسه يطلق نفسه ويعبّر
عن فرحته بالبطل ويغنّى ويصوّر
فتحت بحرين وعليت العلم الاخضر
طلقت سربين تقبل فيها وتبحر
قلنا الصباح وانت صحيتنا بصباح أكبر
يوم القنال انت جددته بيوم الازهر
الله أكبر ولمّا طلعت ع المنبر
نفس الشهيد على عمدان الحرم كبّر
اصـحى يا نايم وحّد الدايم
السعىُ للصوم خيرٌ من النوم
دى ليالى سمحه نجومها سبحه
اصـحى يا نايم.. يا نايم اصحى
وحّد الرزاق
Advertisements

تسعدني تعليقاتكم

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s