المسحراتي فؤاد حداد (65) الحق واجب

Posted: 26 يوليو 2012 in مختارات أدبية
الوسوم:, ,
اصحى يا نايم وحّد الدايم
وقول نويت بكره ان حييت
الشهر صايم والفجر قايم
اصحى يا نايم وحّد الرزاق
رمضان كريم
مســحـراتى
مـنـقـراتى
استثماراتى
أمل ونيه
فى الإنسانيه
الناس هنيه
والشعب قيّم
أختار واقدم
اللى بيخدم
ويا مصر كونى
بهجة عيونى
هلالى ثابت
وعودى نابت
على ثراكِ
علمى اشتراكى
إيمانى مسلم
أختار واقدم
اللى بيخدم
لا تخلّى واحد
ع الكرسى قاعد
يذل تانى
ملزوم يعانى
يقف مكهرب
ودمه يهرب
ويدنه يضرب
تعظيم أفندم
أختار واقدم
اللى بيخدم
خلينى أصبح
إيمانى أصلح
طريقى أملح
دول حديثه
بقلوب حسيسه
ودراع فواعلى
أسبق واعلّى
من قبل ما اهدم
أختار واقدم
اللى بيخدم
خلى الليالى
توصل حبالى
وادور أسحر
الجيزه الازهر
واللى فى بالى
يبان ويظهر
بحس عالى
أختار واقدم
اللى بيخدم
بالمسك أختم
المشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
يا اللى المعانى الكريمه تسعدك وتسر
شرع الكرامه اتوهب قبل الدهب والدر
الحق واجب علينا فى كل ساعه تمر
رمضان هدانى وهلال الهجره فى محرم
أنا ابن آدم مكرم ابن أدم حر
اصـحى يا نايم وحّد الدايم
السعىُ للصوم خيرٌ من النوم
دى ليالى سمحه نجومها سبحه
اصـحى يا نايم.. يا نايم اصحى
وحّد الرزاق

تسعدني تعليقاتكم

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s