المسحراتي فؤاد حداد (77) والله زمان

Posted: 7 أغسطس 2012 in مختارات أدبية
الوسوم:, ,
اصحى يا نايم وحّد الدايم
وقول نويت بكره ان حييت
الشهر صايم والفجر قايم
اصحى يا نايم وحّد الرزاق
رمضان كريم
مســحـراتى قولوا والله زمان
مـنـقـراتى وادى نقره كمان
طول السنه فى حيكم هيمان
قولوا العوافى يا اللى قلبك وافي
من القوافى لما خدت الأمان
قلدت بحر النيل بلا استئذان
بين الشواطيء أمشى بالأحضان
واضاحك الفجريه واسقى الغيطان
واهدى الكبارى نظره الولهان
واكسر خيالى فى كل عود إنسان
وفى نيتى أكبر من الفيضان
الضى بعد الرى من أسوان
عبرة حياتى وصنعة الفنان
معنى المروءه وزرع الاطمئنان
فى كل مطرح لما الاقى حنان
والاقى قعده تجمع الخلان
والاقى نسمه من هوى الأوطان
والاقى قمح وحنب منه ريحان
والاقى طيب‏:‏ أفتكر رمضان
المشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
رمضان حبيب الندى بالعوده أيامه
أنا قلبى ياما نده على معنى أيامه
أذكر المؤمنين بالحق وصيامه
يا مصر يا جنه خضرا ويا رباط الخيل
وجب من الليل جهاد الفجر وقيامه
اصـحى يا نايم وحّد الدايم
السعىُ للصوم خيرٌ من النوم
دى ليالى سمحه نجومها سبحه
اصـحى يا نايم.. يا نايم اصحى
وحّد الرزاق
Advertisements

تسعدني تعليقاتكم

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s