يااااااااااه… 22 سنة مسافر
ومبعتش حتى جواب واحد يبل الريق ولو بدموع…
هو حد كلمك يا با في رجوع،
ولا في طريق يكون رايح جاي؟
طب مش كنت بتقول إن احنا لعينيك الضي،
وكمان مالناش زي يزاحمنا محبتك؟
طيب ليه مستخسر دلوقت فينا تربتك؟
كنت بتكدب ولا بتجامل ولا بتتحامل على نفسك لحد ما تمشي؟
متزعلش مني لو كان لساني طويل وبدافع بيه عن حبك
ما انت عارف إني ما ورثتش عنك حاجة غير الحب
والكدب ما بعرف شكله ولا حججه الفارغة
مش عاوزك يا با ترجع تاني
الدنيا بقت ماسخة وفيه عالم وسخة كتييييير
وانت ربتني على إني ضهري مهما انكسر يفضل مصلوب
وانا دلوقت عايش فعلا مصلوب وبعيوب فوق الوصف
انا بس بستسمحك تسيب الباب شوية موارب
يمكن في يوم اجيلك وحدي
اخد رأيك في حاجات منها: أكمل ولا كفاية ولازم أسافر؟
التعليقات
اُكْتُبْ كَيْ لَا تَكونَ وَحِيدًا 
dad…
إعجابإعجاب