Posts Tagged ‘أحمد فؤاد نجم’

وحدك ونا وحدي
ابكي ساعات وحدي
طول السفر والليل يا غربتي وحدي
صحرا وأنا جمّال شيلة وأنا شيّال
غربة وأنا وحدي

 

عمار يا اسكندرية يا جميلة يا ماريا
وعد ومكتوب عليا ومسطر ع الجبين
لاشرب م الحب حبة وانزل بحر المحبة
واسكن حضن الأحبة والناس الطيبين
***
حكاياتك يا زيزينيا حواديت وناس ودنيا
في حواري إسكندرية وليالى المنشدين
وأما التاريخ يواكب و يزاحم بالمناكب
يتعبى ف المراكب وغناوى الصيادين
***
هيلا هيلا وهيلا بيلا شيال والعمر شيلة
وهموم الدنيا ليلة فيها القمر حزين
ويا موج بحر الليالي عديتك وانت عالي
ودفعت المهر غالي بالأيام والسنين
وعمار يا اسكندرية يا جميلة يا ماريا

إسكندرية تاني و آه م العشق ياني
والرمل الزعفراني ع الشط الكهرماني
والسحر اللى احتويته والبحر اللى احتواني
والبحر أبو ألف موجة والموجة بألف حالة
وانا المغرم صبابة باسكندرية يابا
وفكرة كونى انسى في حكم الاستحالة
***
عشقت بحرك وغرقت فيكي
وصبحت عندك في العشق حالة
وسمعت منك و عشقت بيكي
وعجبني قربك على أي حالة
***
وعاشرت فيكي الخواجة يني
اجريجي لكن مصراوي جني
اسكندراني عاشق أغاني
جعان يغني شبعان يغني
ويبات في حالة يصبح في حالة
وكونه ينسى دي الاستحالة
***
وسمعت صوت النديم نسايم
ع البحر صابحة والبحر هايم
وسمعت سيد بيقول يا مصري
الدنيا صاحية ليه انت نايم
ولما عاند وخاني عصري
لا شد ضهري ولا خد بنصري
***
بنيت في حضنك ع الرملة قصري
وفتحت ع البحر حضن مصري
أدي القضية و أدي الرسالة
وكوني انسى دي الاستحالة
انا الاديب الادباتى الانتخاباتى
هشرحلكم برنامجاتى وانتم عارفين
قرنين لكل جدع منكم طول ما سريركم
مشغول تمللى بناس غيركم وانتم راضيين
وخازوق يكنش على مقاسكم لجل قياسكم
داير على قد مداسكم وانتم حافيين
ولأنى وطنى ديمقراطى لازم أطاطى
للامريكان انا ومراتى وانتم واقفين
والجوع لناسنا اللقاقه والنقاقة
يصرف على كل بطاقة بدل التموين
وأدي اسرائيل الغلبانة ناصبة حدانا
مسرح على عرض قفانا واحنا موافقين
ملعون أبو اللى يزعلكم طول ما عيالكم
مربينهم امثالكم حايسين لايصين
خرفان وخايبين ميت خيبة يا دي العيبة
عايشين قطيع جوه زريبة وانتم ساكتين
ده أي حزب يكون مسعور ما يخليش نور
من طول دراعكم ما هو مكسور واهه كدة حلوين
شكرا على حسن القعدة يكفى مناهده
يا خلق فى الحق مهاودة خليكوا نايمين
يبكي عليك الوتر يبكي الحمام
يبكي عليك الوتر يا شيخ إمام
تبكي القصائد والمعاني يبكوا الغلابة وكل مين يعاني
ما انت الأغاني ياللي تغنـّت
في الحواري والسجون وفي البيوت
أبدا ً مش ممكن تموت
***
لهفي على عودك بقي بعدك وحيد
لهفي على عودك
وين الأنامل ترسم اللحن الجديد
وتدل ع وجودك
وين الرفاقة ف حي الغورية
يشوفوك صبحية ومسوية
ويعرجوا في الليل عليك ت يسمعوا جديدك
ويسهروا للصبحية
***
يا أحمد يا نجم وإنت بلا صحبك يهتز المثال
روح سلم عليه وقل له يسامحك عالهجر اللي طال
خد له بهية معاك
زهر الجناين, سجن القلعة والبحر يضحك ايه
خد له الورود وعبد الودود
تتودع ياللي انكتب له الخلود
طلع الصباح كل الجمال في طلعته
والنور سرح كحل عينينا بفتنته
والطير صدح للمولى جلّت قدرته
الحان جميلة تنعش القلب الحزين
يعد صباحكم كلكم ياشغالين
الشمس طالعة بابتسامة الاْمل
شعلة ياقوت زي الخدود وقت الخجل
بتقول يا نايم قوم بدا وقت العمل
دي الدنيا خيرها وعزّها للشقيانين
يسعد صباحكم كلكم يا شغالين
يا ولاد بلدنا من جنوبها لشرقها
يا مشمرين عن السواعد كلها
النور حضن بلادنا و ضمّها
والشمس هلّت بالامل ع الشقيانين
يسعد صباحكم كلكم يا شغالين

 

في نورك يا هلال العيد
يطير بينا سفين عوام
على الأحلام يودينا
نمد جسور
نعدي بحور مغطية
في مركب نور
عليه الحور مراكبية
قلوعه من نسيج الشوق
يهب الريح
ياخدها لفوق
و دفه من امانينا
بغير ملاح
تغوط في الغريق بينا
عشان نرتاح
نلاقي الموجه لجاجه
و لا نرتاح ولا حاجة
نعود بالحيرة ونعدي
بحور بالحزن مواجه
و ييجي العيد
هلاله جديد
يلاقي الناس حزين وسعيد
حسب شوقه يجود ويزيد
و يحرم ناس على كيفه
يولع للسعيد شمعه
و يرمي البسمة والدمعه
حسب شوقه
و على كيفه
و نورك يا هلال العيد
يطير بينا سفين عوام
على الأحلام يودينا