Posts Tagged ‘صلاح جاهين’

أبدا يا حبيبي أنا أبدا
أنا حبك مقدرش أنساه
إزاي أنسى عيونك مثلا
ده انا قلبي خفيف وانا عارفاه
يا حبيبي… يا حبيبي
***
أنا بحلم بيك ليلاتي وبتحلم بيا ليلاتي
ما تيلا بقى يا حياتي خليني أعيش وياك
اديتك قلبي هدية يا حبيب روحي وعينيا
أوعى تقسى عليا أحسن أزعل وياك
يا حبيبي أبدا أبدا يا حبيبي
***
هتزوقلك يا روحي انت لوحدك يا روحي
لو يتحقق منايا ونشرب الشربات
الورد اللي حوالينا والشمع اللي ف إيدينا
معناه إننا يا روحي هنعيش في تبات ونبات
يا حبيبي أبدا أبدا يا حبيبي
Advertisements

 

ولا غنى ولا صيت وكأنى بسيط
وبسيط ومعايا الشمس مراية الأرض سراية
واغنى واقول:
… مهما اتأخر الفجـر بيطلع يتمخطر
راكب مهرة ولابس أخضر
ويهـز البيرق والراية
… وعد قريب
عمر لجام الدنيا ما سيّب
أعرف حق الصبر الطيب
وتونس عيني السهراية
… ولا نتخلق
ولا نحزن غير لو نتفرق
اسمك اسمى وانا بتشرق
بنى آدم جرحى ودوايا
… ع اللى فتني
أهوى من الطير اللي يغني
ومن الغـزلان المتأني
اللى يعدي قناية قناية
… ع اللى فتنها
والشــمس بتضحك لودانها
واللي اتملك بره غيطانها
ما عرفش الرايحة من الجاية

حلاوة زمان.. عروسة حصان
وان الاوان تدوق يا وله
تعالى لعمك ودوق الحلاوة
وعيط لامك عشان الحلاوة
وعكر في دمك عشان الحلاوة
وآن الأوان تدوق يا وله
-ما ليش دعوة يا مة هاتيلها الحلاوة
=يوه بطل دناوة
-ما ليش دعوة يامة حلاوة حلاوة

 

لو كنتي ست الحسن والجمال
يكون أمير أحلام غرامك أنا
ليكي أول الحدوتة في الدلال
و انا آخر الحدوتة ليا الهنا
***
دقيت عليكي الباب كتير
رد الصدى و قال يا أمير
ما بينكم البحر الكبير
دقيت على الباب بالإيدين
رد الصدى وقالي يا زين
بينك وبينها بلدين
أنا قلت لو بيني وبينها السما
مغرم بها وهي كمان مغرمة
و انا آخر الحدوتة ليا الهنا
***
آه من طريقك الطويل
و لا ليا غير قلبي دليل
عطشان يا مية سلسبيل
حالي يا ست الحسن حال
إرخي شعورك الطوال
خديني من حر الجبال
و ان ما لقيت عندك لقلبي دواه
لاعشق عيون الشمس و اهوى الهوا
***
صبرت لما الود بان
عملت انا تختروان
وحملت قلبي شمعدان
دوِّبتلك بحر الهوى
في كلمة حنقولها سوا
ونقول ده عنقود واستوى
والناس تشوفنا تقول يا ست البنات
حدوتة آخرتها التبات والنبات
وانا آخر الحدوتة ليا الهنا

شيكا بيكا وبولتيكا ومقالب أنتيكا
ولا تزعل ولا تحزناضحك برضه ياويكا
هاهاها ع الشيكا بيكا
***
أنا بضحك من قلبي يا جماعة
مع انى راح مني ولاعة
وبطاقتي في جاكتة سرقوها
وغتاتة كمان لهفوا الشماعة
بقيت أرجف م السقعة
لكن باضحك.. والضحك ده مزيكا
كهربا على ميكانيكا
اضحك ع الشيكا بيكا
هاهاها.. عالشيكا بيكا
***
أنا راح مني كمان حاجة كبيرة
أكبر من اني اجيبلها سيرة
قلبي بيزغزع روحه بروحه
علشان يمسح منه التكشيرة
ادعوله ينسى بقى ويضحك
والضحك ده مزيكا
كهربا على ميكانيكا
اضحك ع الشيكا بيكا
هاهاها.. ع الشيكا بيكا
***
هتقولى الشيكا بيكا ايه هىّ؟
هي الحركات اللي مش هي
الفرقة والحرقة والغرقة
والزمبة فى البمبة الذرية..
بدل ما نطق..ولا لاء نضحك..
والضحك ده مزيكا
كهربا على ميكانيكا
اضحك ع الشيكا بيكا
هاهاها.. ع الشيكا بيكا
ولا تزعل ولا تحزن
اضحك برضه ياويكا
هاهاها.. ع الشيكا بيكا.. ع الشيكا بيكا
الاستاذ يوسف حلمى..!
أهلا عمي..
لا مش فى البيت، أنا باتكلم م الشارع
حلوة، على رأيك، ما هو بيتنا الشارع
كنت فى سهرة و راجع
قلت أتكلم، و أهو من حظى لقيتك
مع ان تصور؟
و انا بانقل أرقام تليفون من نوتة لنوتة
جيت عندك، قام شىء ملعون قال: لأ، ما خلاص
ومشيت سطرين
والتالت قلت: لا يمكن يوسف حلمي خلاص
ورجعت كتبت الاسم، ماخلصنيش
شوف الاخلاص..
كانت سهرة جميلة..
ايوه الشله اياها.. تسلم وتعيش
كانت و حياة النبى عايزاك
غنينا يا سيدى حاجات سيد درويش
معلهش .. ما هو انت برضه كنت هناك
انت تمللى معانا، وحوالينا، و بيننا
موت مين ده يا بو حجاج اللى يخبيك منا؟!
يعنى كان خبى الشيخ سيد؟ .. ما هو زى الجن،
و لا لحظه بيهمد و لا بيون
فى المسرح، فى المصنع، فى الغيط، فى المدرسة، في السجن
ده وتر مشدود يا ابا
لمسوه من كام ألف سنة و لساه بينزن
وكلام بيرن
رنه طويلة طويلة، بتضحك وتئن
من قلب ربابة النيل على قلبه على قلبك على قلبى
على قلب الشمس الشموسة اللى الليله قعدت جنبى
أيوه كان فينا الليله جماعه جداد
انضمت فوجة جديدة، بنات وولاد
طبعا زى المعتاد
صاحيين .. صاحيين .. صاحيين .. صاحيين
قلنا يا سيدى فضلة خيرك “ما تفوقوا يا مصريين”
و”الحلوة دى قامت” و “السياس”
قلنا “بلادى بلادى”
تعرف؟ .. حسيت احساس
ان الشخص البلطجى ده اللى اسمه الموت
عاجز قدام الناس
قلنا “يا هادى يا هادى”
البنت قالتلى: عرفت منين الغنوة دى؟
قدمتك ليها.. وسبتك واقف وياها
سبتك واقف بتكلمها
وتعلمها، وترعاها
ما هو كله كلام
أنا باتكلم م الشارع
والشارع فيه جامع
والجامع مبنى بقاله ميات م الأعوام
انما شبابيكه كلام وبيبانه كلام
و عرايس افريزه كلام، وحيطانه
و المعمارجى اللى بناه واقف قدامى، وبيكلمنى
بيمد لى ايده، بياخد كبريت منى،
بيولع، و بيضرب لى سلام
يا سلام ..
موت مين ده يا يوسف حلمى اللى يحوشك عنى؟؟
تصبح على خير.
فى يوم من الأيام، راح أكتب قصيدة
عن السما، عن وردة على راس نهد
عن قطتى، عن الكمنجه الشريدة
عن نخلتين فوق فى العلالى السعيدة
عن عيش بيتفتفت فى أوده بعيدة
عن مروحة م الورق
عن بنت فايرة من بنات الزنج
عن السفنج
عن العنب، عن الهدوم الجديدة
عن حدايات شبرا، عن الشطرنج
عن كوبرى للمشنقة
عن بطرمان أقراص منومة
عن مهر واثب من على سور حديد
وف بطنه داخلة الحديدة
عن طفل بقميص نوم
عن قوس قزح بعد الصلا فى العيد
عن طرطشات البحر … ح اكتب يوم
ح اكتب قصيدة
ح اكتبها، و ان مكتبتهاش أنا حر …
الطير ماهوش ملزوم بالزقزقة