Posts Tagged ‘عبد الرحيم منصور’

دقوا الأحباب ع الباب
 راجعين يترجونا ويقولوا سامحونا
من بعد القلب ما داب
جايين يزورونا اللى فى يوم باعونا
عاملين حبايبنا قولنالهم توبنا ومعاكوا تعبنا
ياللى انتوا نسيتوا ليالينا إيه تانى عايزين
ده احنا ما صدقنا اتداوينا من جرح سنين
***
عمرنا ما في يوم ردنا مهموم دق الأبواب
لو جانا غريب أو جانا حبيب محتاج لجواب
نديله عينينا نفتحله قلوبنا 
لكن اتعذبنا منكوا يا حبايبنا
***
لا لا تعبتونا.. لا لا ظلمتونا
اسمنا انسوه حبنا انسوه 
اعملوا معروف
ع الذكرى الحلوة على أجمل غنوة
عشناها سوا يا خسارة العشرة
***
أه م الأحزان منك يا زمان ومن الأيام
وتعبنا كمان ولا شوفنا أمان، بقى ده اسمه كلام
يا ما اترجينا يا ما اتعذبنا
لا سألتم فينا ورحمتوا قلوبنا
Advertisements

بيرجعوا الصغار للديار
ويقلعوا هدوم النهار
ويرجع الطير للشجر
بيتولد لسة القمر
وانا تحت عواميد الدروب
مليان قلوب قلوب قلوب
والناس مروحين
بستنظر الغروب
وأدوب أدوب أدوب
أدوب ويا الغروب
وحيد كما ورقة خريف
الريح مرحمهاش
حدفها بعيد
وحيد كما أنى طفل يتيم
فى مواسم الأعياد
من غير عيد
وحيد زى المدينة
مسهمة وحزينة
بلا مواعيد بلا مواعيد
وعلى الطريق جاى المسا
يا حبيبتى ايه اللى أتنسى
بينا ميعاد من غير ميعاد
يا هلترى نسيتي الميعاد

آه آه من حبيبي
عين في الجنة وعين في النار
عامل ساهي لكن غدار
يا ما شفت منه يا ما
يا ما غابت الابتسامة
عشمني بسكة سلامة
وسابني لوحدي في المشوار
***
قاللي بكره أحلى نهار
بحر وسحر وجنة ونار
قاللي الدنيا دي ما تغلاش
عدى العمر حبيبي ما جاش
عشمني بسكة سلامة
وسابني لوحدي في المشوار
***
قالولي عَدي البحر عديته
قالولي عِدي النجم عديته
قالولي بيعي هواكي
قلت لأ.. حبيبي هو اللي أنا حبيته
بحره غويط ضلمة ودوار
خلى الشوق وياه محتار
يا ما حلمت معاه بالراحة
سابني بين رموشه سباحة
عشمني بسكة سلامة
وسابني لوحدي في المشوار

عيونك الرحيل في مواسم الهجرات
وأنا طول عمري برحل ف عينيكي من سكات
***
عينيكي الليل، وأنا ملاح تعبه الضنا
يا ريت يضمنا مرسى ولو ساعات
***
من نظرتك بدوب واكلم الدروب
قلبي يصبح قلوبتدوب المسافات
***
يا طيور النورس انتي نظرات حبيبتي
حطي على سفينتي أو ابعتي سلامات
***
تدور بينا الفصول وتقصر أو تطول
نتمنى ومين ينول حتى ولو ساعات
 جابلك ايه يا صبية حبيبك لما عاد
جابلى عقد وجلابية وقالى كفاية بعاد
قالك ايه يا صبية حبيبك لما عاد
قالي غنوة حب حلوة تتغنى فى كل البلاد
جابلك ايه صبية حبيبك لما عاد
جابلى قلب أخضر على كفه وقالى كفاية بعاد
***
قالى والله الغربة صعيبة
قلتله وانا وحدى غريبة
قالى عملتى إيه فى الغيبة
قلتله لا نوم ولا زاد
جابلى قلب أخضر على كفه
وقالى كفاية بعاد
***
جابلى هدية جوه هدية منقوشة بورد الحنية
فيها شوق حبيبى ليا وبتقولى حبيبى تعالى
جابلى قلب أخضر على كفه وقالى كفاية بعاد
***
قالى عوافى وعوافى
قلتله كلامك دافى
قالى والله بحرك وافى وامواجه عالية وشداد
جابلى قلب أخضر على كفه وقالى كفاية بعاد

عنبى يا عنبى
أستوى على بستانى
والهوى يا عنبى
خدنى وجابنى وودانى
آه يانا يامة
آه على حالى
***
بعتلك سلام فى جناح عصفورة
كتبتلك كلام على ضى قمورة
والهوى عاد من تانى
عاد من تانى سوانى
يا هوى عدينى
بعيد عن الليالى
عدينى ورسينى
على سكة خيالى
آه يانا يامة
آه على حالى
***
بعتلك سلام من عينى بكاية
من عينى ما بتنام فى ليالى نساية
والهوى عاد من تانى
عاد من تانى سوانى
يادى على عقدى
وضفايرى رايحة وجاية
بصعب على وعدى
طيرة وحيدة ومنسية
آه يانا يامة
آه على حالى
***
بعتلك سلام ولا رد موالك
يا أبو العيون غرام
مشغولة على حالك
والهوى عاد من تانى
عاد من تانى سوانى
صورتك آهى
منقوشة على فستانى
سيرتك فى عينيا
وأنت غاوى البر التانى
آه يانا يامة
آه على حالى

أنا أحبك.. أنا أنا أحبك
بكل أمان.. بقلب حنان
بنظرة عينى وموالى
بقولها كتير.. يقولها الطير
وتبقى غنوة يا غالى
أنا أحبك.. أنا أنا أحبك
***
أقولها كمان ..فى كل مكان
وأفرّح بيها أحبابى
واغزلها عقود.. حكايات وورود
واهديها لناسى وأصحابى
أنا أحبك.. أنا أنا أحبك
***
على المناديل… ونجم الليل
كتبت أحبك من قلبى
يسمعها غريب .. ما لوهش حبيب
يتونّس بيها على دربى
أنا أحبك.. أنا أنا أحبك
***
كتير عاشقين .. كتير صابرين
قالولى عاشقة يا صبية
رديت بحنان..قولوها كمان
وانا حاسة الدنيا بإيديّا
أنا أحبك.. أنا أنا أحبك