Posts Tagged ‘نصوص’

أشجان (27)

Posted: 24 أبريل 2018 in نصوص وخواطر
الوسوم:
كان لما بيضحك، تحس.. إن نصره قريب
وانه لا فيه طلاسم ولا صعوبات في الثورة: الناس تخرج وتطالب بحياتها وتهتف بسقوط الجبروت
تخسر مهما يكون: دم ومساجين، عمر بيفرط، نشفان ريق، سنوات عتمة وضيق، لكن ترجع تاني تقوم، تلعن وش البوم وتبدأ تنسج فجر جديد
وبرغم إن الموت عدى وخطفه من قدامنا، لسايا شايفه بيضحك، وماشي يوزع ع المعتصمين في الميادين طيبة وبسمات وشوية صبر
يا عم سعود أنا عارف إنك مستني القومة الجاية فتصحى من قبرك ويا الشهدا وتيجي تقود الهتافات
علشان كدة لسة بشوفك ضحكة بتنور سكة رغم سواد الليل، وبترسم بالألوان ملامح بكره
Advertisements

أشجان (26)

Posted: 21 مارس 2018 in نصوص وخواطر
الوسوم:
ما وحشتكيش.. ما زهقتيش م الموت.. ما شبعتيش أحزان وغياب؟
أنا دوبت بعاد وفقدت الطاقة على فعل الأشياء، وبترجاكي تيجي لو بس يومين، حضنين، بوستين، نظرة تطمن..
طب مدي إيديكي وخديني، ضميني، دفيني، حسيني ونا عايش فا حس وجودي، وانسى حدودي فدوب جواكي وتنسي حدودك.

أشجان (25)

Posted: 18 ديسمبر 2017 in نصوص وخواطر
الوسوم:,
يا عم انت هتهزر، أمال مين هيبقى دكتور ومناضل وصديق
مين هيتبسم في وش الناس ساعة الضيق
مين هيقود النضال في الجامعة لحد ما الثورة تيجي تبل الريق
مين يا رفيق؟
ما ترد…
موت إيه ده اللي يخلي الجو حوالينا خنيق؟
ما هو خد أصحابنا قدامنا بألف طريقة وف كل طريق
مش لسة قايللي هتيجي تاني إمتى قريب؟
خد بالك الموت مش شرير ومش طيب
الموت رحلة جديدة وراحة م الانتظار
صدقني كنت حمار إني ما شبعتش منك
فسلم ع الغايبين عقبال ما اجي
وصدقني مش هتأخر عقبال بس ما اودع كل أحبابي
مبحبش أي مفاجآت ولا عاوز حد يحس يوم بغيابي

أشجان (24)

Posted: 1 نوفمبر 2017 in نصوص وخواطر
الوسوم:, ,
كانت لما بتحلم، بتحلم نور، وعينيها بتبقى أجمل حور، وأما بتضحك يصحى الفجر من نومه علشان يحضنها فيبدأ يومه.
دلوقت الفجر داير في الليل مجنون وهي شبعت موت مع إنها لسة بتحلم بالملكوت مرتاح مبسوط.
نصوص/ أيمن عبد المعطي
لوحات/ يوسف أيمن
تصميم/ نبيل السنباطي
الناشر/ روافد للنشر والتوزيع (2014)
%d8%b555
نهار وصبحني،
شمسه صاحبتني،
ليل ومسيته،
عمر قضيته،
حلم وعديته،
قمر وطفيته،
فجر شقشقلي،
ناداني لبيته،
طهرني من ذنبي،
مفضلش غير حبي،
شهقت من قلبي:
العشق كان دربي،
صدقني يا صاحبي..
هموت ونا مرضي.

 

نصوص/ أيمن عبد المعطي
لوحات/ يوسف أيمن
تصميم/ نبيل السنباطي
الناشر/ روافد للنشر والتوزيع (2014)

%d8%b554

كل يوم أصحى يلفحني الصبح ف وشي،
يعلنلي انتهاء يوم من عمري،
ويحملني بهم جديد!.
نصوص/ أيمن عبد المعطي
لوحات/ يوسف أيمن
تصميم/ نبيل السنباطي
الناشر/ روافد للنشر والتوزيع (2014)
%d8%b553
نفسي
أسافر
في
قطر
ما بيقفش..
في
بلاد
ما بتخلصش..
في
حياة
ما بتنتهيش!.