– هلت روايح م الجنة أشكال وألوان
وبالهدى والنور جالنا شهر القرآن
وحياتنا أصبح ليها معنى بصيام رمضان
= يا ست هانم نفسي أناملي شوية
أرجوكي خلي النوم تشوفه عينيا
– يا روح قلبي إصحى وبزيادة نوم
خلاص جه ميعادك ولازم تقوم
= وأنا أصلي صايم وخليني نايم
عشان أنسى جوعي وأقدر أصوم
– يا أخويا بقى إصحى وبزيادة نوم
خلاص جه ميعادك ولازم تقوم
= وأنا قلت لأ، خلاص يعني لأ
وبالعند فيكي أنا مش هقوم
– كدة.. ما دام كلامي مالوش فايدة
هقلق منامك يا حياتي
= يا ست بزيادة معاندة
عاوز أنام بقى يا اخواتي
– معلش أنا عاوزة أقولك على كلمتين كدة في الصالة
= وانا بقى مش هسمعلك لا كلام ولا أي قوالة
– معلش أنا عاوزة أقولك على كلمتين كدة في الصالة
صغنطتين قوي قد كدة
= وانا قلتلك مش هسمعلك لا كلام ولا أي قوالة
ولا عاوز أسمع بعد كدة
– يا حبيبي قوم بس اسمعني
= يعني هقوم غصب عني
– معلش يا حبيبي طاوعني وتعالى نقعد في الصالة
= حاضر اتفضلي
– يعني خلاص انت صحيت يا حبيبي؟
= نعم، انتي عايزة تقولي إيه بالظبط؟
– أنا عاوزة أقولك، كنت هقولك، قول كدة قول.. قول فكرني
= نعم أفكرك بقى بتصحيني من النوم ونا صايم عشان تقوليلي:
أنا عاوزة أقولك كنت هقولك، قول كدة قول قول فكرني
عن إذنك، أنا داخل أنام
– طب بس استنى
= مش مستني
– ألو.. أيوه، أهلا وسهلا يا نجوى
نعم، بتتكلمي جد
بقى شوشو راحت لخالتها وثريا باعت شقتها، مش معقول
وسميحة بنت جارتنا إمبارح قروا فاتحتها
بقى كدة، طيب اسمعي انتي بقى
مش زينب اخت حسين أفندي
إمبارح جت قعدت عندي
وقالت قال إيه عايزة تخلف، أيوه وحياتك
وولادها بسلامتهم خمسة وكمان عاوزة تخلف لسة
والعيشة صعبة وبتكلف
= يا ست هانم بزيادة بقى
– طيب عن إذنك هبقى أطلبك بعدين
إيه في إيه؟
= بقى شوشو راحت لخالتها وثريا باعت شقتها
وسميحة بنت جارتنا إمبارح قروا فاتحتها
– مش أنا اللي كنت بقول كدة
= أيوه صحيح، سيادتك كنتي بتقولي:
وقالت قال إيه عاوزة تخلف
وولادها بسلامتهم خمسة
وكمان عاوزة تخلف لسة
والعيشة صعبة وبتكلف
– طيب، ونا قلت غير الحقيقة؟
= أيوه أنا معاكي، بس اللي انتي عملتيه غلط
– غلط؟
= أيوه غلط، غلط خالص يا ست هانم
– طب ليه؟
= يا ست هانم ده احنا في رمضان
وبدل ما تقعدي تسمعي قرآن
تجيبي سيرة الناس وهات يا كلام
– طيب ودي تبقى إيه يعني
= دي تبقى يعني يا ست وهيبة
دي تبقى إيه تبقى نميمة وغيبة
ودي حاجة مكروهة وتبقى حرام
– حرام؟
= أيوه حرام
– طيب ما انت كمان اسمحلي برضه صيامك مش راح ينفع
عشان انت بتسهر طول الليل وتنام وتقوم ع المدفع
= أنا فعلا بسهر طول الليل وبنام وبقوم ع المدفع
وصيامي كدة مريحني وغصب عنك لازم ينفع
– غصب عني؟!
= أيوه، عن إذنك أنا داخل أنام
– طب بس استنى شوية عليا أما احكيلك ع الموضوع
= وأنا عاوز أنام من فضلك علشان ما احسش أنا بالجوع
– طب بس استنى
= نعم
– رمضان ما بيقولكش لازم تسهر
وتنام نهارك كله وتقوم تفطر
على حاجات دافية وسخنة وساقعة
رمضان عايزنا نعيشه زي عاداتنا
ونقوم بأعمالنا وجميع واجباتنا
ووقتنا نقضيه في أعمال نافعة
= أعمال نافعة؟!
لكن أنا مبسوط كدة مرتاح كدة
وصيامي كله راح يكون بالشكل ده
أسهر لحد السحور وأنام لحد المدفع
وما دام هصوم بالطريقة دي
عندي الصيام هيكون عادي
وأقوم في وقت الفطور آكل لغاية ما اشبع
– تشبع؟
ونا مش معاك رمضان ما بيقولكش
تقضي وقتك كله في البيت نايم
= يعني انتي عايزاني في بيتي ما انامشي
أمال هروح فين بس أنام ونا صايم
– لا مؤاخذة، أصلك مش فاهمني
= مش فاهمك، طب ليه؟
– رمضان عاوزنا يا حبيبي نصوم
عشان نحس بقسوة الحرمان
وساعتها لما نشوف واحد محروم
نسعى إليه بالعدل والإحسان
= مظبوط، دلوقت بس يا روحي فهمتك
وثبتلي إنك زوجة صالحة ونافعة
– طب خش البس لاجل تلحق شغلك
= شغل ده إيه، ده احنا النهاردة الجمعة