Posts Tagged ‘علي الحجار’

كانت ألوان الناس والعربيات والدكاكين

بتغطي اللوحة المجروحة

المرسومة في قلبك

كنت بشوفك تمشي في قلب الشارع وحدك

بين الزحام والألوان

كنت بحس إنك ناسية الحب المسكين

من زحمة ألوان الناس والعربيات والدكاكين

تنفض الناس والعربيات

وتنام الدكاكين

تسقط من صدر اللوحة ألوان

كانت بتغطي الحتة المجروحة

وآلاقيكي تحت فانوس دبلان الضي

قاعدة لوحدك تبكي

على الماضي والحاضر والجاي

وبحبك أيوه بحبك

واحلفلك إني بحبك

رغم إن أنا عارف انك

من ألم الجرح في قلبك

بقى كل العالم عندك

عالم كداب ووعوده سراب

لكني ألف بحبك واحلفلك اني حاحبك

وحيجي اليوم واثبتلك

إني راسملك لوحة في قلبي بلون وحنين

غير الوان الناس والعربيات والدكاكين

نويت اغني وقلبي دق
حضنت عودي قالولي لأ
انا قلت آه يا ليل يا عين
والعود تجلى والطبل دق
ده المغنى واجب.. المغنى حق
***
اشمعنى صوت الطيور حلال
تقاسيم إلهي رقة وجمال
لا حد قاسى ولا حد قال
ده كفر بين ولا حد زق
ده المغنى واجب.. المغنى حق

***

انا طير مغني عشي سمايا
العود هوايتي والناي هوايا
وبكرة تسمع الناس غُنايا
ويقول معايا اللي قلبه رق
ده المغنى واجب.. المغنى حق

***

الفن ماله؟ ده الفن نعمة
في البرد شمس.. في الحر نسمة
قمر ونجمة مكتوب وقسمة
وسهم حبه ف الروح رشق
ده المغنى واجب.. المغنى حق

يا زقزقات الكناريا

دنيتنا بايعة وشارية

فينا وبتصحي فينا

جروح ماضينا الدفينة

واحنا في توهة وهرية

***

دنيا شقا كلنا عيشها

والخوف راعشنا وراعشها

ووحوشها طيشها ناعشها

ونافشة ريشها وضارية

يا زقزقات الكناريا

***

عدوة ولا صديقة

يا دنيا ده الناس في ضيقة

بس الحقيقة المضيئة

أحكامها ع الكل سارية

***

امتي الوحوش في جحورها

يترد كيدها لنحورها

والدنيا تصفى بحورها

بين السمك والبِساريا

يا زقزقات الكناريا

دي دمعة من قلبي على الخد جارية؟!
ولا دي بسمة.. نسمة في مسامّي سارية؟!
لا لا.. دى أرواح طاهرة طايرة ف براح
وذكرى عمر ف توهة وف توبة راح
يا قلبى عيش مع زقزقات الكناريا
***
بين دنيا دايرة جروحها في روحنا غايرة
وأماني فايرة في دنيا تانية مغايرة
فيه قلة جايرة وقلة غايرة ومعايرة
والناس مسايرة وحايرة أو فاهمة قارية
ويا قلبي عيش مع زقزقات الكناريا
***
بين رهبة م التوهة.. وتوبة برغبة
سددنا دينّا وغيرنا أغنى وأغبى
وقلوب مصاحبة الحق صاحية ومشاغبة
وقلوب تدوب في قلوب.. ولا هيه دارية
ويا قلبى عيش مع زقزقات الكناريا

نفس الشموس بتبوس على روسنا

نفس التراب يحضن خطاوينا

طب ليه بنجرى ونهري فى نفوسنا

وليه نعيش ناكل فى بعضينا

***

يا غربة الإنسان ما بين ناسه

يا توهة الروح في زمان مشيوه

ناس الزمن ده ليه بيتناسوا

والإبن ما بقاش يرعاش بيت أبوه

***

يا غربتي بين صحبتي وأهلي

يا توهى الروح في زمان مجروح

بهدهد الأحلام على مهلي

يا خوفي قبل ما تيجي عمري يروح

***

يا غربة الإنسان عن روحه

لما يبيع روحه عشان المال

بوم الخراب يزعق على سطوحه

ويقضي عمره يجرجر الأحمال

***

آدى الحقوق وآدى اللى طالبينها

والحق تاه فى الباطل البطال

وقلوبنا تاهت عن محبينها

ونجومنا عالية بعيدة ما تنطال

تحت نفس الشمس وفوق نفس التراب

كلنا بنجري ورا نفس السراب

كلنا من أم واحدة، أب واحد، دم واحد

بس حاسين باغتراب
***

ليه بنتغرب في دنيتا الغريبة

ليه نقابل كل شيء بشكوك مريبة

ده احنا لو عشنا حياتنا بصفو نية

نجمة الحلم البعيد هتبان قريبة

***

يا زمان الغربة دورنا مهما دورنا

روج بتبدرنا وريح تضرب صدورنا

بس طول ما قلوبنا مليانة محبة

كل هبة ريح هنا تغرس جدورنا

***

ليه تفرقنا الأماني والمطامع

إيه يفيد المال إذا ما مال زماني

مال تجيبه الريح تروح تاخده الزوابع

يا ما فضة انفض سوقها في ثواني

***

يا زمان الغربة يا ملفلف كسورنا

يا للي بتزوم فوق عششنا وفوق قصورنا

طول ما بنحب الحياة وبنحب ناسها

لا الجدور هتبور ولا تنهار جسورها

***

الحقيقة نار تعيش تحت الرماد

في ضياها بهتدي لحلمي بخيالي

والمحبة تفجر الروح في الجماد

وبمحبة قلبي هقدر ع الليالي

***

يا زمان الغربة مهما حتكاسرنا

حلمنا هنحققه مهما خسرنا

طول ما خيرنا لغيرنا حتى لو رحلنا

في الحياة هنمد لينا جدور مسيرنا

***

من حنان الحب هل الغل جانا

من مرارة الغل جلجل صوت رجانا

نبكي م الغل اللي بيعكر حياتنا

ولا م الحب اللي هدهدنا وشجانا

***

يا زمان الغربة ليلك بيحاصرنا

وفي ضلامه المر طاوينا وعاصرنا

بس طول ما الحب بيرفرف علينا

الجدور هنمدها ونصنع مصيرنا

السجن مش أحجار ولا أسوار ولا قضبان

وأنا مش لازمني زنزانات ولا باب ولا سجان

أنا سجني جوايا تنوره دموعي

زنزانتي في قلبي

قضباني في ضلوعي

أنا لا قتلت الوردة

ولا دوست علي بستان

انا قتلتني وردة

كان عطرها أحزان

مش عاوز أقول مظلوم

أنا عاوز أقول متهان

أنا يا ناس متهوم

ميت بلا أكفان

محبوس في حكاية

وسجني جوايا

يا عم أدم عيالك متبعترين ف المتاهة

دسنا بقدمنا خيالك

وحياتنا ضلت خطانا

مدينا ف الكون خطانا

زدنا ف غلطنا وخطانا

واما زمانا عطانا

صرنا لإبليس بطانة

العلة دي منا فينا

والا دي علة دفينة

يا دنيا لا تلفلفينا

ولا تلعبي بالسفينة

ورسيها على مشتهاها

***

لما رفضنا رضانا

روحنا برضانا لقضانا

سكنت همومنا في عضانا

وصريخنا ضاع في فضانا

يا حلم بينا وبينك

بحر ومستصعبينك

وبشوقنا مستقربينك

جاوب على طالبينك

بلغ قلوبنا مناها

نحلم واذا ما تحققتشي الأماني
نزعل شويه بس نحلم تاني
لا تجعل الأحزان تهش الحلم
ولا تخلي الليل يبكي الأغاني
ساعات ورا ساعات تلف تدور
الليل بينهي النور وينهي نور
يبقي الربيع مالي الجنينه زهور
يصبح خريف عاري الورق والقلب
يشقي اللي عاشق واللي عمره ما حب
يبقي الجناح م الشوق بيعلى لفوق
وفجأه ينزل ع التراب مكسور
***
انا وانتي فرعين مرجحتهم ريح
انا وانتي قلبين مطووحين في الهوا
يللي كتبتوا القسوة ع المجاريح
القسوه مش ممكن تكون الدوا
ولا توانسنا علي شط الخريف

 

 

بحلم وافتح عينيا على جنة للإنسانية
والناس سوا بيعيشوها بطيبة وبصفو نية
***
يا دنيا ولا حدي ضهري ليكي ولا أعيش في قهري
يا ما نفسي يصفالي دهري وترجعي حقانية
***
لأ يا دنيا اجري غري غيري ولعبي ودري
أما أنا رغم مري نفسي عزيزة وغنية
***
دنيا غرورة دنية زي الحنش شرانية
ويا ريت نأمن هداها ونعيش سوا بصفو نية
***
أحلامي تصلبلي ضهري ويروق ويصفالي دهري
ويلالي زهري وجواهري لكل ناسي وليا
***
يا دنيا مهما تغري غيري مسيرك تمري
وبعد مري تسري نفسي العفيفة الغنية
***
لا  المال ينور طريقي ولا البنون بلوا ريقي
عملي في حياتي رفيقي في وقفتي الآخرانية

 

قالوا زمان دنيا دنية غرورة
وقلنا واللي تغره يخسر مصيره
قالوا الشيطان قادر وله ألف صورة
قلنا ما يقدر ع اللي خيره لغيره
***
إيه معنى دنيتنا وغاية حياتنا
إذا بعنا فطرتنا البريئة الرقيقة
إزاي نبص لروحنا جوا مراياتنا
إذا احنا عشنا هربانين من الحقيقة
***
المال تجيبه الريح وتاخذه الهوايل
 أما البنون يوم الحساب بيفوتونا
مال إيه ده لو كان مال قارون كله زايل
ولا غير عمايل الخير يا هوه ينجدونا
***
ومين نكون إن بعنا يومنا وماضينا
وليه نعيش إذا كانش بكرة يراضينا
وازاي ننام من غير ما نحلم ببكرة
وبكرة ده منين ييجي إلا بإيدينا

 

الله يا كريم
رمضان كريم الله أكرم
ندهه أدان مغربه أرحم
دا النسمه بتهفف وتفوت
برد وسلام على من أسلم
رمضان كريم.. الله أكرم
رمضان وحس الشيخ رفعت
النقشبندي صدى الكروان
يا مصر يا مأمنة برفعه المصطفى وحفظه القرآن
يا مطمئنة بأل البيت، انا يا حسين زرت وصليت
شاهدت نور النبي وبكيت
اطعمني أكرم من أطعم
رمضان كريم الله أكرم
رمضان وصلوات التراويح، وخلق سمحه بتدعي الله
وقلب دايب م التسابيح، مصابيح تنور للي هداه
يا مصر يا مرسي الحيران، يا حته م الجنه في رمضان
رمضان كريم ابن الانسان بيدعي للاسم الأعظم
رمضان كريم الله أكرم

نورك هلاله بان
عدى خلاص شعبان
هليت يا شهر الخير
شرفت يا رمضان
***
أهلا يا مسحراتي
هنشوفك تاني يوماتي
وبصوتك صحي النايم
اتسحر يا لا يا صايم
وانوي صيام رمضان
***
يا لا يا ولاد قيدو الفوانيس علقوا زينة
رمضان جانا وفرحنابه هل علينا
دي كنافتك حلوة يا عم عزيز
بالجوز واللوز والطعم لذيذ
يا شهر الخير أشكال وألوان
ويا ريت السنة كلها رمضان
***
في كل حته نروح فيها موائد رحمن
يا بخت من فطر صايم يوم من رمضان
هنصلي التراويح في الأزهر
وهنقعد للفجر نكبر
ويا ريت السنه كلها رمضان

يا مهون الاحمال

زمانا حاله مال

والدنيا راكبه شمال

واللي معاه المال

بطال وانا عمال

***

يا مهون التحاميل

كتفي بكتف زميل

بس الكتاف بتميل

وانفكت الصواميل

م الجوع وم الاهمال

***

يا مهون الحمول

حكمك بات مشمول

وعملنا معول

بكره اللي جاي مأمول

مش جاي بلا رسمال

 دوري ولفي يا حياة دوري بينا 

وبلاش بقي م اللون دا وخفي 

وزي ما بنحبك حبينا 

احلامنا تقصر ليالينا 

اشواقنا تهون أيامنا 

وأمالنا يرفرف حوالينا 

وادي المستقبل قدامنا 

انما بقي مش طايلاه اكتافنا 

***

يارب الطف بنا وبناسنا 

واكسر وسواسنا في صدورنا 

نفسنا نعيش رافعين راسنا 

ولا ان زمانا يغدرنا 

ويا عيني مالك بترفي 

دوامة شدتنا وجت رجلينا

وحاجة من جوانا ماتت فينا

رجلينا جت في الخية

عيني علينا

يا خوفي لا تلفلف على رقابينا

دوامه شدتنا ولعبت بينا

شدينا يا دوامة فوق شدينا

عاشق بس تعبت سكوت

امتى يا صوتى يكونلك صوت

بينى وبينك سور ورا سور


لا انا متحرر ولا مأسور

لا انتى معايا … ولا انتى بعيد

لا انتى حزينة … ولا انتى سعيدة

يا معلمة قلبى التنهيدة

من ايام وسنين وشهور

عاشق بس تعبت سكوت


امتى يا صوتى يكون لك صوت

امتى ياقلبى تعدى حدودها


وازرع على شباكى وردها

من حبات الندى والنور

بينى وبينك سور ورا سور

ده انتى ملكتى خيال وعقلى


انا مجنون ولا اتهيألى

عمرى ما قولت الاه غير ليكى

ولا هيكون لى حياه غير بيكى

راسم صورتك على شبابيكى

وعلى جناح قلبى المكسور

بينى وبينك سور ورا سور

عاشق عيونك يا ملاكي
وأهاتي عدت شباكي
أولها من قلبي الباكي
وثانيها من بعد رحيلك
لو كان بإيدي اعديلك
***
على حالي ببكي وعلى حالك
والآه بتجري وراحالك
يا للي اتسرق منى جمالك
على حالي ببكي وعلى حالك
لو كان بإيدي اعديلك
مرمر زماني زماني زماني زماني مرمرش
حاسب يا سيدي يا سيدي يا سيدي ما تتأمرش
***
بنغنّي لجل الناس الناس
في إمبابة ولا ف أبو العباس
لكل حارة إيدين تنباس
ما دام بتبني ولا تدمرش
مرمر زماني زماني مرمرش
***
لابوس إيدين دبّاح العجل
وابوس إيدين مِن يكسي الرٍجل
وأبوس إيدين بياعة الفجل
بتبيع ثمار ولا تستثمرش
مرمر زماني زماني مرمرش
***
يا خلق هوه خليكوا شاهدين
قريبي في الدنيا و ف الدين
واخد نصيبي من الفدادين
وسّـكتله لكن ما طمرش
مرمر زماني زماني مرمرش
***
مكتوب لغيري يقـُشّ الزاد
وليه يا طيري أعيش مِنكاد
قاللي المثل قرّشك صياد
وابن الغلابة ما بيزمّرش
مرمر زماني زماني مرمرش
***
زعلان يا باشا زعلان ليه
عشان غلطنا وقولنا يا بيه
طربوش جنابك يا اختي عليه
لمّا بسرعة رجعتله مارش
مرمر زماني زماني مرمرش
***
إسمعها كلمه من المنقوش
على كل ساقية وكل شاكوش
إن كنت ناوي على حلّق حوش
أموت وعرقي ما يُستعمرش
مرمر زماني زماني مرمرش